Traumaarbet
Mer aui hend öisi Erfahrige gmacht im Louf vom Läbe. Schöni, loschtegi ond tolli Erfahrige, ned säute gez aber ou Momänt met schwerige, schockierende, onerwartete ond belaschtende Erläbnis. Bi settige Erläbnis redt mer de gärn mou vo traumatische Erfahrige.
Mängisch chönd das ou eifach huufe chlini Ereignis ond Erläbnis si, das muess ned emmer es grosses ond offesechtlech traumatisierends Erläbnis si. Wenns öppis esch wo för dech schwerig esch oder du grad Müeh hesch demet omzgoh de daf das so si ond esch okey so. Du muesch dech för das ned rächtfertige ond besch ou niemerem e Erklärig schoudig. Aui die chline ond grosse Ereignis chönd bi öis Spure henderloh ond begleite öis vo dem Momänt a i öisem Autag – öb mer wönd oder ned. Mängisch send so Erläbnis för öis so schlemm ond belaschtend ases öises Verhaute ond Handle rechtiggehend beiflosst oder es henderet öis sogar dra gwössni Sache chönne z’mache, z’organisiere oder z’erledige.
Inere erste Phase noch some traumatisierende Ereignis esch das absolut verständlech ond ou normau aber es söu ned si, as so öppis öises gsamte wiitere Läbe bestemmt. Drom esches i mine Ouge wechtig, so Theme azgoh ond ech onderstötze dech gärn debi.
Wechtig esch mer, as du weisch as du ou met minere Onderstötzig dini traumatische Erläbnis ned wersch vergässe. Das muesch du ou ned, wöu öb du wottsch oder ned, es ghört zo der. S’Ziu esch aber, as die Erläbnis ond d’Erennerige dra so i dini Läbesgschecht chönd integriert wärde as du metne chasch omgoh ond sie dech nöme (be-)hendere dor de Autag z’goh ond dech devo abhaute dis Läbe so z’gstaute wie du das wettsch. Du söusch weder chönne entspannter ond liechter dine Autag gstaute ond läbe ond debi ou weder chönne Fröid ond Zfredeheit gspöre.
EMDR
Ech schaffe houptsächlech met de i de 1980er Johr vo de Dr. Francine Shapiro entwecklete, sogenannte EMDR-Methode.
EMDR chond usem Änglische:
Eye Movement Desensitization and Reprocessing.
Dor die Ougebewegige wo mer bi dere Methode macht, chönd traumatischi Erennerige verarbeitet wärde. Vereifacht erklärt duet mer met dere Methode eigentli die sogenannti REM-Phase vom Schlofe könstlech härefüehre. D’REM-Phase esch nämli genau die Schlofphase wo könnzeichnet esch dor schnöui Ougebewegige ond s’Tröime, die Schlofphase wo d’Erläbnis vom Tag verarbeitet wärde. Ond noch traumatisierende Ereignis chond natürli näbstem Schlof grondsätzli ou genau die sogenannti REM-Schlofphase sehr hüüfig z’chorz.
Mis Agebot
Bi de Traumaarbet fende d’Setzige vor Ort im Praxisruum statt. Bevor mer aber zäme a dim Trauma oder dine traumatische Erfahrige chönd schaffe geds es Könnelehr- ond Ufnahmegspröch. Das esch wechtig, wöu ech mer muess chönne es Böud mache wie stabil du besch. So chani besser abschätze wie gschwend ech met der a dine Theme cha ond daf afo schaffe.
Das chostets
De Priis pro Behandlig esch abhängig devo, wie lang d’Behandlig duuret.
Setzige vor Ort duured i de Regu e Stond.
Stondepauschale
Administrationschöste pro Setzig
CHF 120.00
CHF 5.00
Priise i Notfausituatione
(aso ennerhaub vo 24-36 Stond)
Notfaupauschale zuesätzlech
CHF 25.00
ABER: Dini finanzielli Situation söu dech ned devo abhaute dech bi mer z'mäude!
Mer wärde ganz secher e gueti Lösig fende.
Wechtig!
Du muesch zwenged wösse ond der bewusst si:
Ech mache kei Heiligsverspräche ond ech ersetze ou kei ärztlechi oder psychologischi Berotig/Betröig.
Das heisst met dim Okey (as ech dech daf behandle) bestätigsch du mer, as du weisch as
DU die 100%igi Verantwortig öber dis Handle ond Verhaute i dim Läbe bhautisch!!
