Was esch Energiearbet
D’Energiearbet berueht ufem Gloube, as jeglechi Beschwärde (körperlech, geistig ond emotional) dor s’Nötze vo de Verbendig zwösche Körper ond Geist chönd glenderet wärde.
Grondsätzli muess mer sech bewusst si, as öise Körper, jedi einzelni Zälle komplett us Energie bestod. Dor verschedensti Faktore ond Erläbnis, chas im Körper entsprächend zonere Störig vo dem normale Energiefloss cho. Ond genau die Störig im Energiefloss füehrt de früehner oder spöter zo diverse Veränderige i öisem Körper. Wärde die Veränderige ond de Versuech vom Körper öis öppis metzteile gnue lang ignoriert, chonds ergendwenn zo schwärwiegendere Beschwärde. Settegi wo de nöm so gäbig chönd usbländet wärde – hüfig i Form vo ergendwelche Schmärze oder psychische Symptom wo eim im Autag düend beiträchtige.
Eini vo de hüüfigste Ursache vo settigne Beschwärde send igschlossni Emotione. Ned säute bouet de Körper de met so igschlossne Emotione Härzmuure uf i de Hoffnig sis Ennerste z’schötze. Drus resultiere düend stattdesse bispöuswis ongwollti Verhautensmoster, soziale Röckzog oder ganz huufe anderi onnötegi ond belastendi Sache.
Met de Methode vom Dr. Bradley Nelson esches mögli genau settegi igschlossni Emotione ond die sogenannte Härzmuure i öisem Körper weder ufzlöse. S’Ergäbnis esch es herrlechs ond liechts Gfühl (oms Härz – wies so schön heisst).
För wär esches?
För aui wo wönd (auti) igschlossni Emotione loswärde zom i Zuekonft chönne offener ond liechter dor s’Läbe goh – brueflech ond privat.
Ond öbrigens: die Methode fonktioniert ou bi Tier.
Bi was höufts?
Bi folgende Sache chani dech as Emotionscode-Awänderin onderstötze
Wenn emmer weder glichegi Situatione (wo grondsätzli gar ned so tragisch send) i chörzister Ziit zomne totale Usraschter oder Träneusbroch füehre.
So zom Bispöu:
-
Im Gschäft
-
I de Schuel oder im Chendergarte
-
Bi Familiealäss - ond settegi chöme jo im Louf vom Läbe so einegi zäme
-
I Beziehige (Partnerschaft oder onder Kollege)
-
Imene Verein
-
I de Kita
-
Ufem Arbetswäg – uuuuh jo ech weiss Outo fahre cha so asträngend si – ganz z’Schwiige vom Benötze vo ÖV – eifach wöu desi Mönsche müehsam send. …oder liids äch vellech a öis säuber as öis desi Mönsche so närved?!
-
Bim Poschte
-
Im Usgang
-
Bim dor d’Stadt schlendere
-
Wemer (gmüetli wett) am See setze ond d’Freiziit (in Rueh!) gniesse
-
… - aso du xehsch – eifach bi jenste Situatione wo Mönsche ufenand träffe
Körperlechi ond/oder seeleschi Beschwärde wo die gnaui Ursach nie usegfonde worde esch ond drom schiins niemer cha häufe.
Aso chroneschi Beschwärde wie:
-
Chopfweh
-
Röggeweh
-
Glänksschmärze
-
Schwerigkeite met de Verdouig
-
Bluetdrockproblem
-
Läbesmettuonverträglechkeite
-
Höischnopper
-
Allergie
-
Huutproblem
-
Asthma
-
Schlofstörige
-
Angst-/Panikattacke
-
...
Wenn du traumateschi Sache erläbt hesch – das cha, muess aber ned emmer es grosses offesechtlechs Trauma si.
Erläbnis wie:
-
S’Mami/de Papi oder e anderi Bezogsperson wo notfaumässig is Spital hed müesse
-
Omzog met Schueu-/Arbetsplatzwächsu
-
Verlost vonere Arbetsstöu
-
E schwärwiegendi xondheitlechi Diagnose bi eim säuber oder im Omfäud
-
Stritigkeite / Gspröch wo ned för dini Ohre dänkt xi send
-
Es belastends Gspröch: im Gschäft, met Familieaghörige, guete Frönde, inere Beziehig
-
Trennig oder Scheidig vo de Öutere, vo de Grossöutere, vom Gotti, vom Götti oder anderne wechtige Mönsche im Läbe
-
Mobbing
-
Züüge wärde oder beteiliget si bime Omfau
-
Negativi Erfahrige bi Prüefige, metere Lehrperson oder ere vorgsetzte Person
-
...
Du xehsch, die Liste god is onändleche. Mängisch esches rüdig schwerig sech säuber z’igestoh, as die Symptom, wo vellech scho sedere gfühlte Ewigkeit vorhande send, eigentli ned normau send. Sech z’igestoh, dass die Symptom ned eifach dezue ghöre nor wöus jetz haut scho lang so esch oder wöu de Vater oder d'Grosmuetter scho die gliche Problem gha hed.
-
Mer Mönsche söued ond mönd weder lehre uf öise Körper lose
-
Mer mönd öis bewusst si asmer döffe xond ond beschwärdefrei läbe
Drom mäud dech bi mer (alles nötige fendsch onder «Kontaktdate») wenn s’Gfühl hesch du wottsch jetz öppis Nöis usprobiere, öppis wo ned no weder honderti vo Ondersüech öber dech muesch loh ergoh, öppis wo eifach chasch säge ech bruche jetz öpper wo sech dem anehmt wöu eifach kei Loscht meh hesch met dine Beschwärde z’läbe nor wöus jo bis jetz ou emmer ergendwie gange esch.
Ech fröie mech dech ond/oder dis Chend könnezlehre ond e betzwiit döffe z’begleite ufem Wäg ines hoffentlech chli liechter’s, entspannter’s ond z’fredniger’s Läbe.
Mis Agebot
Mini energetische Behandlige biet ech einersiits uf Distanz, aus sogenannti Färnbehandlige ond andersiits ou vor Ort im Praxisruum a.
Färnbehandlige fonktioniere so, as du mer dis Okey gesch, as ech dech daf behandle ond denn mach ech das ohni as du muesch i minere Nöchi si. Wie gnau das fonktioniert, erklär ech der gärn bime erste Könnelehrgspröch – am Telifon oder persönlech.
De Vorteil bi Setzige vor Ort esch, as du dech säuber aktiv chasch ibrenge was dech grad beschäftiget, a was du wettsch schaffe oder was vellech grad schwerig esch. Ond ech cha der erkläre was ech mache ond wieso ech was mache. Zuesätzlech chasch du natürli ou grad vorewäg dini Gedanke ibrenge oder dini Froge kläre.
Das chostets
De Priis pro Behandlig esch abhängig devo, wie lang d’Behandlig duuret
Setzige vor Ort duured i de Regu e Stond. Bi energetische Färnbehandlige chas si as e Behandligssequänz ou mou nor 15 oder 30 Minute duuret.
Stondepauschale
Administrationschöste pro Setzig
CHF 120.00
CHF 5.00
Priise i Notfausituatione
(aso ennerhaub vo 24-36 Stond)
Notfaupauschale zuesätzlech
CHF 25.00
ABER: Dini finanzielli Situation söu dech ned devo abhaute dech bi mer z'mäude!
Mer wärde ganz secher e gueti Lösig fende.
Wechtig!
Du muesch zwenged wösse ond der bewusst si:
Ech mache kei Heiligsverspräche ond ech ersetze ou kei ärztlechi oder psychologischi Berotig/Betröig.
Das heisst met dim Okey (as ech dech daf behandle) bestätigsch du mer, as du weisch as
DU die 100%igi Verantwortig öber dis Handle ond Verhaute i dim Läbe bhautisch!!